Nehemiah 5
13. . . . 饜尵饜尠饜尫 饜尩饜尠饜尭 饜尠饜尰饜尰饜尠 饜尣饜尠饜尲饜尠饜尮饜尳饜尭饜崈: 饜尠饜尲饜尨饜尳. 饜尵饜尠饜尫 饜尫饜尠饜尪饜尮饜尦饜尨饜尦饜尶饜尳 饜崋饜崅饜尠饜尶饜尵饜尠饜尳 饜尵饜尠饜尫 饜尣饜尠饜崉饜尠饜崊饜尮饜尦饜尨饜尦饜尶饜尳 饜尭饜尠饜崉饜尠 饜崊饜尠饜尶饜崅饜尦 饜尠饜尰饜尰饜尠 饜崈饜崏 饜尲饜尠饜尳饜尠饜尣饜尨饜尮. 14饜尵饜尠饜尫 饜崋饜崅饜尠饜尲 饜尭饜尠饜尲饜尲饜尠 饜尦饜尠饜尣饜尠 饜尨饜尮 饜尠饜尳饜尠饜尡饜尠饜尶饜尭 饜尲饜尮饜崈 饜尨饜尮 饜崊饜尨饜尮饜崈饜尵饜尠饜尶 饜崋饜尠饜尶饜崅饜尠饜尲饜尠饜尭饜尰饜尨饜尮饜崈 饜尮饜尪饜尨 饜尮饜尳 饜尮饜尶饜尦饜尠饜尮饜尠, 饜崋饜崅饜尠饜尲 饜尵饜尨饜崅饜尠 路饜尯路 饜尶饜尳饜尦 饜尵饜尨饜崅 路饜尰路 饜尵饜尠饜尫 饜尠饜尳饜尭饜尠饜崅 饜尠饜崅饜崉饜尠[饜崅]饜尯饜崈饜尠饜尮饜崅饜尯饜崈饜尠饜尶饜崈 饜尭饜尮饜尶饜尦饜尠饜尳饜尮饜崈 路饜尮饜尡路 饜尵饜尨饜崅饜尠, 饜尮饜尯 饜尵饜尠饜尫 饜尡饜崅饜崏饜尭饜崅饜尵饜尶饜崈 饜尲饜尨饜尮饜尳饜尠饜尮 饜尫饜尰饜尠饜尮饜崋 饜崋饜尠饜尶饜崅饜尠饜尲饜尠饜尭饜尰饜尨饜尮饜崈 饜尲饜尨饜尮饜尳饜尮饜崈 饜尳饜尮 饜尲饜尠饜崉饜尮饜尦饜尨饜尦饜尶饜尲. 15饜尮饜尭 饜崋饜尠饜尶饜崅饜尠饜尲饜尠饜尭饜尰饜尵饜崏饜崈 饜尭饜尠饜尮饜尨饜尮 饜崊饜尨饜尮饜崈饜尶饜尳 饜崋饜尠饜尶饜崅饜尠 饜尲饜尮饜崈 饜尯饜尠饜尶饜崅饜尮饜尦饜尨饜尦饜尶饜尳 饜尭饜崏 饜尲饜尠饜尳饜尠饜尣饜尨饜尮饜尳 饜尵饜尠饜尫 饜尳饜尨饜尲饜尶饜尳 饜尠饜崉 饜尮饜尲 饜尫饜尰饜尠饜尮饜尡饜尠饜尳饜崈 饜尵饜尠饜尫 饜崊饜尨饜尮饜尳 饜尵饜尠饜尫 饜尳饜尠饜尶饜尫饜尭饜尠饜尳饜尶饜尫 饜崈饜尮饜尰饜尶饜尡饜崅饜尮饜崈 饜崈饜尮饜尯饜尰饜尨 路饜尲路, 饜尵饜尠饜尫 饜崈饜尯饜尠饜尰饜尯饜崏饜崈 饜尮饜尪饜尨 饜崋饜崅饜尠饜尶饜尵饜尮饜尳饜崏饜尦饜尨饜尦饜尶饜尳 饜尭饜尮饜尪饜尠饜尮 饜尲饜尠饜尳饜尠饜尣饜尨饜尮饜尳; 饜尮饜尭 饜尮饜尯 饜尳饜尮 饜崉饜尠饜崊饜尮饜尦饜尠 饜崈饜崊饜尠 饜崋饜尠饜尶饜崅饜尠 饜尠饜尳饜尦饜崊饜尠饜尮饜崅饜尭饜尵饜尠 饜尠饜尣饜尮饜崈饜尮饜崈 饜尣饜尶饜尦饜尮饜崈. 16饜尵饜尠饜尫 饜崊饜尠饜尶饜崅饜崈饜崉饜崊 饜尭饜尮饜尪饜崏饜崈 饜尡饜尠饜尶饜崅饜尣饜崈饜崊饜尠饜尦饜尦饜尵饜尠饜尶饜崈 饜尮饜尳饜崈饜崊饜尮饜尳饜尭饜尮饜尦饜尠, 饜尵饜尠饜尫 饜尭饜尠饜尶饜崅饜崁 饜尳饜尮 饜尣饜尠饜崈饜崉饜尠饜尮饜崈饜崉饜尠饜尰饜尦, 饜尵饜尠饜尫 饜尭饜尮饜崊饜崏饜崈 饜尲饜尨饜尮饜尳饜尠饜尮 饜尵饜尠饜尫 饜尠饜尰饜尰饜尠饜尮 饜尭饜尠饜尮 饜尣饜尠饜尰饜尮饜崈饜尠饜尳饜尠饜尳饜崈 饜尦饜尶 饜尭饜尠饜尲饜尲饜尠 饜崊饜尠饜尶饜崅饜崈饜崉饜崊饜尠. 17饜尵饜尠饜尫 饜尮饜尶饜尦饜尠饜尮饜尨饜尮饜崈 饜尵饜尠饜尫 饜尭饜尠饜尮 饜崋饜尠饜尶饜崅饜尠饜尲饜尠饜尭饜尰饜尵饜崏饜崈 路饜崅路 饜尵饜尠饜尫 路饜尳路 饜尣饜尶饜尲饜尠饜尳饜尨 饜尵饜尠饜尫 饜尭饜尠饜尮 饜尩饜尮饜尲饜尠饜尳饜尦饜尠饜尳饜崈 饜尠饜崉 饜尶饜尳饜崈饜尮饜崈 饜尶饜崈 饜尭饜尮饜尶饜尦饜崏饜尲 饜尭饜尠饜尮饜尲 饜尡饜尮饜崈饜尶饜尳饜尵饜尠饜尳饜尨 饜尶饜尳饜崈饜尮饜崈 饜尠饜尳饜尠 饜尡饜尮饜尶饜尦饜尠 饜尲饜尨饜尮饜尳饜尠饜尲饜尲饜尠 饜尠饜尳饜尦饜尳饜尶饜尲饜尠饜尳饜尠饜尮 饜崊饜尨饜尮饜崈饜尶饜尳. 18饜尵饜尠饜尫 饜崊饜尠饜崈 饜崋饜崅饜尠饜尩饜尶饜尲饜尠饜尳 饜尦饜尠饜尣饜尮饜崈 饜崍饜尮饜尪饜尶饜尫 饜崈饜崉饜尮饜尶饜崅 路饜尠路 饜尰饜尠饜尲饜尡饜尠 饜尣饜尠饜崊饜尠饜尰饜尮饜尦饜尠 路饜尩路 饜尵饜尠饜尫 饜尣饜尠饜尮饜崉饜崈 [路饜尠路] 饜尣饜尠饜尲饜尠饜尳饜崊饜尮饜尦饜尠 饜崊饜尠饜崈 饜尲饜尮饜崈; 饜尵饜尠饜尫 饜尡饜尮 路饜尮路 饜尦饜尠饜尣饜尠饜尳饜崈 饜尣饜尠饜崋 饜崊饜尨饜尮饜尳 饜尠饜尰饜尰饜尠饜尮 饜尭饜尮饜尪饜尠饜尮 饜崋饜尮饜尰饜尶饜崈饜尳饜尠饜尮 饜尵饜尠饜尫 饜尠饜尰饜尰饜尠饜尮 饜尭饜尮饜尪饜尠饜尮 饜尲饜尠饜尳饜尠饜尣饜尨饜尮饜尳; 饜尵饜尠饜尫 饜尠饜尳饜尠 饜尭饜崏 饜尠饜尰饜尰饜尠 饜尫饜尰饜尠饜尮饜崋 饜崋饜尠饜尶饜崅饜尠饜尲饜尠饜尭饜尰饜尨饜尮饜崈 饜尲饜尨饜尮饜尳饜尮饜崈 饜尳饜尮 饜崈饜崏饜尯饜尮饜尦饜尠, 饜尮饜尳 饜尭饜尮饜崈 饜尨饜尮 饜尳饜尮 饜尯饜尠饜尶饜崅饜尮饜尦饜尨饜尦饜尵饜尠饜尶 饜尭饜崏 饜尲饜尠饜尳饜尠饜尣饜尨饜尮饜尳 饜尮饜尳 饜尭饜尠饜尮饜尲 饜崊饜尠饜尶饜崅饜崈饜崉饜崊饜尠饜尲 . . . .
Copyright information for
Wulfila